पौरखले भरिएकी आमा मेरी यीनै हुन्
ममताले सिन्चिएकी आमा मेरी यीनै हुन् ।।
जन्मदिंदा प्रसवको पीड़ा पनि छिपाएरै
मझेरीमा तेर्सिएकी आमा मेरी यीनै हुन् ।।
सन्तानको खुशी हेर्न जे नि गर्न सक्ने गरी
साहसले बाँधीएकी आमा मेरी यीनै हुन् ।।
मृत्युसम्मै दु:ख गर्ने बिनास्वार्थ मायाँ भर्ने
ईश्वरसंगै उब्जिएकी आमा मेरी यीनै हुन् ।।
जब शंकाको उठान हुन्छ
बिस्वासको पुरै अबशान हुन्छ ।।
लूटकै बोली फूटकै बोली
तोतामैनाको रटान हुन्छ ।।
सोझाको ओझेल निर्धाको हेलाँ
नामुद बुज्रुकको बखान हुन्छ ।।
बोल्दैन कोहि सुन्दैन कसैले
अतिको शासन पेलान हुन्छ ।।
अराजकता बढ्यो खुबै छातीभरि देश दुख्छ
भ्रस्टाचारी हुँदा जम्मै छातीभरि देश दुख्छ ।।
लुटाउने र फूटाउनेले छक्कल मारी हिंडेपछि
मानवता गुम्यो पुरै छातीभरि देश दुख्छ ।।
जनताहरु भोकैनांगै रुंदाखेरि अभावले
पीडा दु:ख जताततै छातीभरि देश दुख्छ ।।
हेर्ने आसा देख्ने आसा शान्ति अनि संबिधान
फेरी मिल्यो धोकामात्रै छातीभरि देश दुख्छ ।।
नचम्क तिम्रो शान क्षणिक हो
मन्त्रीको स्वाभिमान क्षणिक हो ।
बेच लुट सक्दो मोज मज्जा गर
पदमा रित्तो बखान क्षणिक हो ।
कर्णाली रुँदैछ तिमी धोक्रो भर
बिदेशी यो अनुदान क्षणिक हो ।
जान्छ कुर्ची त्यो लुटिन्छ पजेरो
सिंहदरबारको पहीचान क्षणिक हो ।
कोशी गण्डकी उर्लिंछन जब
इँट सिमेन्टको ढलान क्षणिक हो ।
प्रगतिले लामा पाईला चाली रहुन् समीपमा
टीका अनि जमराको थाली रहुन् समीपमा ।
दुर्गामाता दाइना हुन् है लक्ष्मीले बास गरुन्
बाटैभरी फूलैफूलको डाली रहुन् समीपमा ।
खुसीहरू आउन् अनि दु:खहरु हराउन् ती
जताततै विजयका ताली रहुन् समीपमा ।
बिजयादशमीको आसिर्बाद यही मिलोस
इज्जत र सम्मानका लाली रहुन् समीपमा ।
एकैछाक खाँदापनि अघाउने तै जोगी हो
रातैभरी पंचधुनी जगाउने तै जोगी हो।
सांसारिक मायाँमोह भोगविलास गुमाएर
शिरपाउ गेरुबस्त्र लगाउने तै जोगी हो ।
शंख फुक्दै रातीराती दशघर डुल्दै हिंडी
भुतप्रेत किचकन्या भगाउने तै जोगी हो।
भन्छन कोही सयौंघर डुलीआ'को भिक्षाबाट
भट्टी पुगी जाँडरक्सी मगाउने तै जोगी हो ।
नबोलेका कुराहरु मीठा लाग्छन् आजभोली
नखोलेका कुराहरु मीठा लाग्छन् आजभोली ।
दोषादोष मुखामुख गर्छौ तिमी केका लागि
नपोलेका कुराहरु मीठा लाग्छन् आजभोली ।
केके बोलें मातैमातमा खिचडी नै बन्यो अरे
नमोलेका कुराहरु मीठा लाग्छन् आजभोली ।
चाहे तिमी सुन हाल नत फेरी चांदी मिसाऊ
नघोलेका कुराहरु मीठा लाग्छन् आजभोली ।
यता उता हेर्छु तिम्रो चालै राम्रो लाग्छ काली
त्यो भन्दा नि अझैबढी गालै राम्रो लाग्छ काली ।
उत्ताउली छौ चन्चले छौ झंकारभने मीठो दिन्छ्यौ
गोरो हो कि कालो हो खोई छालै राम्रो लाग्छ काली ।
सल्किएका अंगहरु छल्किएका रंगहरु
पुस्टपुस्ट अग्लो जीउ डालै राम्रो लाग्छ काली ।
मन परेको मान्छेले त जे गरे नि राम्रै भन्छन्
ढल्की ढल्की हिड्ने तिम्रो तालै राम्रो लाग्छ काली ।
सिर्जनाका चोरहरु धेरै बढे यहाँ
रचनामा फोहोरहरु धेरै बढे यहाँ ।
आजपनि अस्मीजीको गजल चोरियो
बैमानीका बागडोरहरु धेरै बढे यहाँ ।
कहिलेसम्म हामी त्यसै थुनिएर बस्ने
उपहासका खोरहरु धेरै बढे यहाँ ।
कोहीको नाम बेची आफ्नै बाढी ल्याउने
कोशी र तमोरहरु धेरै बढे यहाँ ।
तिमी गुरु पिरतीको म त तिम्रो चेला न हो
गरेदेखि मायाँ हुन्छ नगरे त हेला न हो ।
भेट्ने छुट्ने क्रमहरु चलिहाल्छ जिन्दगीमा
रुने हास्ने भन्ने कुरा ईश्वरको खेला न हो ।
चन्द्र आउने सुर्य जाने अनौठो यो सगरमा
ताराहरु झिलिमिली गोधुलीको बेला न हो ।
कतै भाग्य धनमा पर्ला कतै कोही भोकै मर्ला
ऐसआराम भोगविलास दुइपलको भेला न हो ।
