गाजलु ती ठुला ठुला आँखा
तीर बनी बसे यो दिलैमा
कालो लामो परेली केश
छाल परे कलिलो मायामा
निधारको त्यो रातो टीका
छाप बनी बस्यो यो दिलैमा
झल्केको त्यो नाकको फुली
ज्योति बन्यो कलिलो मायामा
पातलो त्यो मधुर ओठ
स्वाद बनी बस्यो यो दिलैमा
मिलेका ती दाँतका पंक्ति
मोती बन्यो कलिलो मायामा
महेन्द्र वीरविक्रम शाह द्वारा रचना गरिएका गीतहरु - पृष्ठ २
गरौँला हामी सिर्जना अर्को प्रीतिको जगतमा
सुन्दर मीठो भावना नयाँ भरेर दिलैमा
पुगौँला हामी सगरमाथा, ताराको छायामा
सम्झनाको झझल्को लिई, जुनेली रातमा
गरौँला हामी सिर्जना अर्को प्रीतिको जगतमा
लुका है मारी खेलौँला हामी, गोरेटो बाटोमा
इन्द्र है धनु जुरेली पारी, पुगौँला चुलीमा
गरौँला हामी सिर्जना अर्को प्रीतिको जगतमा
पहिलो दिन भेटेको बेला, कङ्गाली मनैमा
बितेका दिन भएका कुरा, साचौँला छातीमा
गरौँला हामी सिर्जना अर्को प्रीतिको जगतमा
सुन्दर मीठो भावना नयाँ भरेर दिलैमा
गर्छिन् पुकार आमा रोई कराई जोडले-
'होइन मेरो' भन्छिन् सन्तान थरीथरीका ।'
कोही धनी असाध्य, कोही गरीब माग्ने,
'सक्दिनँ देख्न' भन्छिन् सन्तान थरीथरीका ।'
नाङ्गो छ आङ कहीँ, कहीँ पोसाक मखमल,
'सक्दिनँ हेर्न' भन्छिन् 'सन्तान थरीथरीका ।'
सुनको थाल काहीँ, काहीँ छ पात खाली,
'सक्दिनँ सुन्न' भन्छिन् 'सन्तान थरीथरीका ।'
भन्छन् 'महल' कसैका, काहीँ छ चुथ्रो झुप्रो
'सक्दिनँ सहन' भन्छिन् 'सन्तान थरीथरीका ।'
के छ र दिऊँ तिमीलाई मैले कोसेली भनेर
ल्याएको थिएँ दुई थोपा आँसु पोखियो छल्केर
के छ र अरु मसँग दिऊँ कविता छोडेर
कोरेको थिएँ त्यही दिऊँ भनी मेटियो झस्केर
ल्याएको थिएँ गीत यो दिन तिमीलाई भनेर
पवन बिच बिलाइगयो त्यो पनि गएर
ल्याएको थिएँ दुई थोपा आँसु पोखियो छल्केर
तस्वीर थियो मसँग एउटा राखेको खिचेर
पुरानो भ-ई त्यो पनि आज, गएछ रोएर
दियेको थिएँ मायाले एउटा चिनो है भनेर
त्यो पनि फिर्ता दिऊँ कि भन्दा गएछ खिएर
ल्याएको थिएँ दुई थोपा आँसु पोखियो छल्केर
किन किन तिम्रो तस्वीर मलाई निको लाग्छ
नबोलेर जति हेर्छौ, उति हिस्सी लाग्छ
अँध्यारोमा रात बीच तारा बीचै घुम्छ
जुनेलीमा जूनसितै ओर्ली मुख चुम्छ
एकलास ठाउँमा त्यो साथी मेरै बन्छ
आधा रातमा ब्यूँझे पनि सिरानीमै हुन्छ
प्रभातको मिर्मिरे उषा जब हुन्छ
मेरो मनको झझल्कोमा पहिले आइपुग्छ
बिछोडको वेदनामा जति छाती पोल्छ
मिलनको कल्पनामा त्यही आशा बन्छ
खोकिलामा राख्छु जसै मुटुभित्रै पुग्छ
जति टाढा पुग्छु सधैँ नजिक त्यही हुन्छ
आकाशका तिर्मिरे तारा म गन्न सक्तिनँ
मनको कुरो मुखमा ल्याई म भन्न सक्दिनँ
साउने झरी ढुङ्गेलो बाटो बिर्सिन सक्दिनँ
बिर्सेर पनि त्यो दिन आज बिर्सिन सक्दिनँ
धाराको कुना निरको भेट म भन्न सक्दिनँ
झरीको पछि लागेको जून बिर्सिन सक्दिनँ
जुनेलो छाया मायालु उनी म भन्न सक्दिनँ
हातमा हात परेको बेला बिर्सिन सक्दिनँ
