सोध्यौ प्यारा, तिम्रो वचनले के गर्यो
कोमल छातीमा गोलीले जे गर्यो
बोल्यौ मीठैमीठै ती ओठ पनि मुस्कुरायौ
मायाको नक्कली मुस्कानले के गर्यो
भेट्यौ रोजैरोजै यात्रा पनि सँगै गर्यौ
आधीबाटोमा छोड्ने साथीले के गर्यो
पियौ सँगैसँगै लागे जस्तो पनि गर्यौ
होशमै हुँदा बेहोशी मान्छेले के गर्यो
मायाप्रेम भन्ने पनि सञ्जोगको कुरा रैछ
फुटेपछि नजोडिने सौभाग्यको चुरा रैछ
देउरालीमा चढाएथ्यौ सपनाका फूलहरू
बर्षौ पछि गई हेर्दा मात्र केही झुरा रैछ
जीवन देथेँ मैलेभने मेरा लागि तिमीसँग
खोकिलामा लुकाएको धारिलो त्यो छुरा रैछ
आफूभन्दा पनि धेरै तिम्रा लागि बाँचेको छु
तिमीलाई भने प्यारो सुन्दरी र सुरा रैछ
कृपा धेरै भगवानको मैमाथि परेको छ
थोरैथोरै अरूलाई मलाई दुःख पूरा रैछ ।
