आँखा चिम्लेर पनि तिम्रै धूनमा
आँखा खोलेर पनि तिम्रै धूनमा ।।
रात दिन, साँझ बिहानी पनि
छैन काम, मात्र तिम्रै धूनमा ।।
जुनेली रात या औंशी अँध्यारो
आकाश हेर्दै बस्छुं तिम्रै धूनमा ।।
स्पन्दन होस् या सासको आरोह
लय हाल्दै बस्छुं तिम्रै धूनमा ।।
सुधीर ख्वबि द्वारा रचना गरिएका गजलहरु
मनले मनलाई चाहेको छ,अब आउनु तिमी ।
मायाको मीठो गीत मेरो लागि गाउनु तिमी ।।
अम्बरमा जून,शीतल छ पवन ,रात मदहोश ।
मेरो तन मन, आत्मामा घनघोर छाउनु तिमी ।।
प्रेम रसले सरोवर, ती मायाका न्यानो स्पर्श ।
दिनु अलौकिक अनुभूति,साथै पाउनु तिमी ।।
माया , अलंकार , आभूषण सबैथोक माया नै ।
यो मधुरात, जूनमा नुहाउनु जूनै लगाउनु तिमी ।।
आफ्नै घरमा लगाई आगो न्यानो ताप्न थाले
मेटन तिर्खा रेटि गला हेर अंजुली थाप्न थाले ।।
चोट कस्तो छ, गहिरो कति छ भनेर नै संधै
घाऊ कोत्याई कोत्याई नै सबैले नाप्न थाले ।।
विवेक बुद्धिमा घाम लाग्न जब छोड्यो सबैको
अकल्पनिय अवस्थाले देश समाज चाप्न थाले ।।
चुपचाप चारैतिर विरोधको धुन कहीं केहि छैन
अराजकता , त्रासदी तब झन झन फ़ाप्न थाले ।।
